eymingjablogg

Finnur er 5 ára í dag og ég finn ekki afmælisgjöfina hans :-(

Hefði svoleiðis getað svarið að ég setti hana inn í fataskáp hjá mér þegar ég kom með hana heim um daginn. Búin að róta út um allt í skápnum en hún finnst hvergi. Næsta skref er að tæma skápinn alveg. Óskiljanlegt bara.

húrra, messan er að fara að koma út :-)

Smekkleysa í ágúst, þeir eru með heimsins bestu svipu á sér, þannig að ég þarf ekki einu sinni að spyrja - Ágúst hvaða ár? Verður í síðasta lagi í desember.

hvað er þetta með þessa fýlu sem kemur af manni þegar maður notar brúnkukrem. ojbara. En ég hlýt að verða voða brún og sæt í kvöld eða á morgun.

Aðalfundur Tónskáldafélagsins á morgun annars, svo félagsmönnum og mökum boðið í mat og ótakmarkaðan drykk. Verst að vera að halda upp á afmæli drengsins á sunnudaginn, þannig að varla verður maður til fimm í þetta skiptið. Kannski er það nú samt kostur en ekki galli.

Bekkjarkvöldið gekk fínt, tvær bekkjarhljómsveitir, ógnarkraftur, sé fram á þátttöku í músíktilraunum eftir ekkert allt of mörg ár. Kláruðust ekki nándarnærri allar flatkökurnar það var þvílíkt magn af mat þarna. Hér verða allir að taka flatkökur með osti með í nesti á morgun.

jahhá!

bara atvinnutilboð í tölvupóstinum

meira af því seinna.

Bekkjarkvöld hjá þeirri eldri á eftir, vonandi verða sumir strákanna ekki með hálftíma atriði eins og venjulega...

ég er annars bekkjarfulltrúi, varla búin að gera nokkurn skapaðan hlut í vetur (ætla ekki að bjóða mig fram til áframhaldandi setur) Fyrsta bekkjarkvöldið sem er haldið. Það eru held ég búin að vera þrjú hjá þeirri yngri, ásamt endalausum leikjadögum og ferðum í keilu og á skauta. Fullmikið, eiginlega. En þessi í sjöunda bekk eiga svosem að sjá um þetta svolítið sjálf. Ef þau langar í keilu tala þau sig bara saman.

jæja, best að fara að smyrja fjóra pakka af flatkökum með osti (tímdi ekki hangikjöti) til að leggja á hlaðborðið.

einkavæðing er hið frábæra svar við öllu ekki satt? sjá hér.

Það er sumt sem er fínt að einkavæða en annað á bara að láta kyrrt eins og það er. If it ain't broken, don't try to fix it.

ég hef lengi verið að velta fyrir mér hvaðan allir þessir broskallar koma!

fórum í göngutúr í grasagarðinn nokkrar suz gellur. Fullt af plöntum að stinga upp kollinum, ródódendronrunnar í fullum skrúða rétt hjá Kaffi Flóru. Urðum reyndar svekktar að það væri ekki búið að opna kaffihúsið, neyddumst til að fara í kaffi upp á Konditorí Copenhagen. Ekki að það sé neitt sérlega slæmt, reyndar...

bara læti í áhugamannabandinu. Við erum að fara upp í Skálholt, síðustu tónleikar starfsársins verða þar. Nema hvað, aðalstjórnandinn okkar var orðinn svo pirraður á því að vera ekki búinn að fá neinar nótur, né einu sinni almennilega upp gefið hvað ætti að spila að í hann hljóp stífni og hann bara harðneitaði að fara. Okkur tókst samt að lempa hann til þannig að það verður farið austur. Hefði verið eitursúrt fyrir trompetsólistann sem spilar með okkur, örugglega búinn að vera að æfa konsertinn sinn í allan vetur.

þá er hún Freyja litla skottan mín komin með bloggsíðu, vonandi endist hún betur en systir hennar.

eyddi öllum morgninum í að klippa og líma, búa til próf fyrir suzukibörnin. Fjör - eða kannski ekki. Ég er ekki þessi föndurtýpa. Hefði verið miklu fljótari að gera þetta í tölvunni en þá hefði ég eiginlega þurft aðgang að skanna. Það hafði ég ekki í morgun. zúrt.

Annars eru þessir kennsludagar þegar prófin eru byrjuð bara ansi hreint ljúfir. Bara mæta og sitja yfir, eitt barn í einu inni í munnlegu prófunum, öll voða þæg og ljúf (og stressuð, múhahahaha) Ekki nema 3 mánudagar eftir í kennslu, annar í hvítasunnu truflar og vikan eftir það fer í upptökupróf fyrir slúbberta sem náðu ekki 7...

í tilefni Formúlu dagsins...

var á æfingu á Carmina Burana hjá Fílharmóníu í morgun. Hallveig systir að syngja sóló, ég skaust á æfingu, ætlaði að spara mér miða á konsert, svolítið dýrt inn, sko. Nú náttúrlega dauðlangar mig á tónleikana, hef ekki heyrt kórinn svona góðan í mörg ár, ef nokkurn tímann, Hallveig stendur alltaf fyrir sínu, Óli Kjartan og Þorgeir Andrésar frábærir, drengjakórinn úr Kópavogi (Karlakór Kópavogs) bara fínn. Ekkert smá stuð líka með allt þetta slagverk, landslið slagverksleikara mætt á svæðið. Tónleikar annað kvöld og svo á þriðjudagskvöldið, inni í Langholtskirkju.

sko... Jóóón, er ekki öll fjölskylda þín að syngja? eruð þið ekkert í vandræðum með að koma út boðsmiðunum ykkar (blikk, blikk...)

Þarf ekki að vera sorrí, svekkt og sár, slatti af fólki sem þorði ekki annað en fara inn á rúv og hlusta. Þetta eru bara svo skemmtilegir tónleikar, hef sjaldan skemmt mér eins vel. Svo er bara að tékka hvort maður geti kannski snapað sér upptöku af lögunum. Ætli ég þurfi nokkuð leyfi frá STEFi og FÍH ef ég hef samþykki tónskálds og flytjenda?

Hér eru tónleikarnir, ykkur til ánægju og yndisauka. Verð geðveikt móðguð ef enginn hlustar og kommentar (grrrr!)

gleðilegt sumar, allir

Minni á tónleikana, verða á Rás 1 klukkan 16.10 í dag, hasarinn og brandararnir eru í seinni hlutanum

NHØP dáinn. Held ég sakni hans meira en páfans :-(

Var annars ekkert smá viðbjóðslega dugleg áðan. Hallveig er í LJóðaakademíunni hjá Kristni og Jónasi í Salnum, vantaði nótur og bað mig koma með þær. Ég fann nóturnar og skutlaðist inn í Kópavog. Nema hvað, í staðinn fyrir að setjast niður og hlusta á spennandi masterklass fór mín í ræktina að hamast. Stefni hins vegar á að fara og hlusta á morgun, 2-3 tíma.

Í gær kúrðum við elsta dóttirin uppi í rúmi og ég var að hjálpa henni með heimavinnuna. Meðal annars íslensku, eitthvað orðaforðadæmi í vinnubók við Skruddu (ekki þó þessa Skruddu). Lýsingar á fólki og hún átti að finna eitt lýsingarorð sem við átti. Til dæmis: Siggi kemur alltaf með vel útilátið nesti í skólann, en tímir aldrei að gefa neinum með sér. Siggi er ____________. Flest var nokkuð augljóst, þó ekki allt, nískan hjá Sigga kom hikstalaust. Síðasta spurningin var hins vegar: Jón kann mannasiði og kemur alltaf vel fram. Jón er ____________. Og hvað haldið þið að hún hafi sagt, eins og skot? Kurteis, nehei. Jón var sko nörd...

veit ekki hvert ég ætlaði.

Annars var þetta góð stund hjá okkur. Hún átti líka að finna skammstafanir sem hún þekkti, skrifa hvað þær þýddu og finna aðra möguleika. Upp var gefið td. BSRB, Bandalag sóprana og rámra baritóna, ekki slæmt. Hún mundi eftir ASÍ; við fundum út í sameiningu: Alþjóðlegt skeinifélag ísbjarna. Og varð úr því mikið hláturskast, sérstaklega þegar ég sagði henni að hún yrði náttúrlega að teikna lógóið. Gott að geta dottið í hláturskast með unglingnum sínum ennþá.

húrra húrra, var að fá þennan líka fína tenór til að syngja með okkur í Skálholti í sumar. Hinar raddirnar ættu að vera góðar. Þetta verður gaman :-)

Ekki virðist Páfagarður nú verða frjálslyndari með þeim nýja. En hann Steini organisti, lærður í Vatikani segir hann vera mikinn tónlistaráhugamann, sem er gott.

fór með yngri krakkana tvo í tékk til hne-læknisins, mikið gott að það þarf barasta ekkert að gera, enginn vökvi, ekkert gat, enginn roði. Þau mega reyndar bæði blása út hellu, þurfti að kaupa einhvern hellubelg fyrir strákinn, en það er nú minnsta málið. Ekki einu sinni mikil hella, bara smá.

köttsa er úti í garði að leika sér að risastórri býfluguhlussu. Það er fyndið.

börnin spiluðu voða vel, mest fútt í Chicago medleyinu, fullt af blásurum og slagverki og sveiflu. Alltaf öfundaði maður lúðrasveitarkrakkana að fá að spila svona skemmtilegt meðan litlu strengjasveitirnar okkar sörguðu kurteislegan Corelli eða eitthvað. Þarna var staddur Halldór upptakari í glænýju hlutverki sem túbuleikari, gaman að því.

Náði svo í skottið á æfingunni, síðustu 3 kortérin (hún var kortér framyfir) Poulenc kemur til, jájá. Samt ekki vel skrifaður fyrir raddirnar.

Upplestrarkeppnin hjá henni Fífu á eftir, ég er að kenna og kemst ekki, ekki séns :-(

Svo er hún að spila á tónleikum í kvöld, afrakstri helgarnámskeiðsins. Og ég á kóræfingu. Sveimérþá ef ég skrópa ekki bara á fyrri hlutann af æfingunni, þó tónleikarnir nálgist með ógnarhraða. Börnin manns verða að ganga fyrir, ekki satt?

hvurn dauðann ætli ég hafi verið að spá, þarna í gærkvöldi? hmmmm.

auðvitað vorum við ekkert heima í kvöld, með öll börnin í burtu. Hinn flottasti matarklúbbur með frönsku þema. Flóknar umræður, ég efast um að ég eigi nokkuð eftir að útskýra þær neitt betur. Kannski bara eins gott, maður veit ekkert hver les (sko, Væla, ég get þetta vel...)

Hei, ég frétti í gær að tónleikarnir hjá Hallveigu, Eyva og Árna Heimi fara inn á netið þannig að það verður hægt að sækja þá. Snilld. Verða annars líklega klukkan 4 síðdegis. Fylgjumst spennt með.

Fífa i burtu, Freyja gistir hjá vinkonu, Finnur hjá Ragnheiði Dóru systurdóttur minni og foreldrum. Mikið tómlegt hérna heima.

fór á hina skemmtilegustu tónleika í kvöld. Blásarasveit Reykjavíkur með verk eftir MacMillan, Hilmar Jensson og Hindemith. MacMillan er alltaf flottur, Hilmar stóð nú samt alveg í honum. Hindemith kunni langbest á miðilinn, reyndar, en það var samt eina verkið sem ég hugsaði stundum: er þetta ekki bráðum búið.

Fífa er farin á hljómsveitarnámskeið á Laugalandi í Holtum. Þar lærði pabbi hennar að synda, hryllti sig allan þegar ég fór að tala um staðinn. Ugh. En það verður samt pottþétt gaman á námskeiðinu. Hún á mjög góða vini í hljómsveitinni, það skiptir öllu máli.

hér sést hún Freyja mín í miðjum hópnum sínum. Svolítið dökk mynd, sést örugglega ekki mjög vel nema fólk hafi þeim mun betri skjá. En hún er þarna í rauðum bol og svörtu pilsi, flott stelpan :-)

freyja og hopurinn hennar Originally uploaded by hildigunnur.

hlutasnobbið í manni. Fór á klútakynningu áðan og keypti fullt af drasli. Reyndar ýkjur, en ég keypti samt smá. Hrrikalega sniðuga græju til að þrífa inn í ofnunum og undir ísskápnum og sjónvarpsskápnum. Rándýrt en þess virði. Tók eitt swipe undir sjónvarpsskápinn til að sýna Jóni og Fífu, fékk á tilfinninguna að ég væri komin með Heiðar snyrti og Margréti hússtjórnarkennara yfir mig, með hneykslunarsvipinn.

Sá reyndar minn fyrsta svoleiðis þátt áðan, náði á hann á netinu. Ojbara. Held reyndar að ég horfi ekki á fleiri, þvílíkt artificial dæmi. Fólkinu kennt þetta svakalega sniðuga trikk: Taka til í hverri viku. Öllum í fjölskyldunni, sínu í hvoru lagi. Vá, aldrei hefði mér dottið svona sniðugt í hug...

hei, ég mundi það :-) var reyndar ekkert merkilegt. Ætlaði bara að monta mig af því hvað við erum stabíl, ég kom hingað heim með 8 rauðvínsflöskur í gær en við fengum okkur ekki rauðvín samt. Hins vegar gætum við fallið fyrir einni bjórdós á eftir, ætluðum að grilla á morgun en Fífa verður farin á hljómsveitarnámskeið og Freyja í afmæli þannig að ég ætla að leggja til að við grillum á eftir í staðinn. Mmm.

búin að fá Something Rotten, er að treina hana, var byrjuð að lesa lengri David Eddings seríuna mína, 10 bækur, búin með fyrstu 3. Fínt, bara, hefur maður eitthvað til að hlakka til.

Eitthvað þvílíkt merkilegt sem ég ætlaði að blogga um en séns að ég muni hvað það var, ónei. Kannski man ég það seinna. Best að gefa kettinum aðra saltstöng.

Þessi líka fína danssýning í kvöld, litla skotta var að dansa með djassballetthópnum sínum á lokasýningu skólans í Borgarleikhúsinu. Tók þær upp á band (hmm, harðan disk), er að hlaða myndunum inn á tölvuna. Kannski kemur mynd af henni hér næst.

Var að sjálfsögðu best í sínum hópi :-) ekki einu sinni ýkjur, hún var búin að vera hálfu ári lengur í dansi en þær flestar, var sett fremst í miðjuna og leiddi hópinn. Við voða montin. Hefði vel ráðið við hópinn fyrir ofan en það er líka hollt að fá stundum að vera bestur og leiða. Um að gera að halda svo áfram, henni þykir ógurlega gaman að dansa. Hefur hreyfiþörfina frá pabba sínum, ekki er hún frá mér...

Gatnamálayfirvöld í borginni eru gersamlega ljósaóð. Ég var að hneykslast á nýju ljósunum á Bústaðaveginum, þessum við nýja veginn út í Vatnsmýri, skelfilega illa samstillt við rest, amk á þeim tímum dags sem ég á leið þar hjá. Þá datt okkur systrum í hug að telja ljósin á hinum beina og breiða vegi, Snorrabraut-Bústaðavegi. Byrjuðum á Sæbraut (rétt hjá mér) og enduðum við Breiðholtsbraut (rétt hjá henni). Niðurstaðan varð á þessum 5 1/2 kílómetra: heil tuttugu umferðarljós, bara tvenn af þeim gönguljós. Þetta er náttúrlega bilun. Væru þau nú almennilega samstillt... (jú, ég veit, ég veit, ekki einfalt)

það eru mörg ár síðan ég hef skemmt mér svona vel á tónleikum. Fyrri hlutinn virðulegur og fínn, voðalega fallegt og ljúft, nýja lagið eftir Jórunni Viðar glæsilegt, ég skil ekki í öðru en að lögin tvö verði alltaf flutt sem lítill lagaflokkur héðan í frá.

Í seinni hlutanum slepptu þau fram af sér beislinu, bæði dúettarnir mínir og svo Heimskringluflokkurinn hans Tryggva voru leikþáttur uppi á sviði, enda hló fólk og hló. Verst að þetta var ekki tekið upp fyrir sjónvarpið, hefði verið úrvals sjónvarpsefni. Það var hins vegar tekið upp fyrir útvarpið, verður flutt á sumardaginn fyrsta fyrir ykkur öll sem misstuð af tónleikunum.

Svo fórum við heim til mín og stútuðum nokkrum rauðvínsflöskum til að fagna.

takk fyrir skemmtunina krakkar :-)

ertekkjað DJÓKA ÍMÉR???????????

í kvöld :-) (tja, hluti af því, amk) Ef þið þekkið þetta ekki, komið þá og hlustið. Ef þið þekkið hlýtur ykkur að langa til að koma...

Endurtekið efni:

tónleikarnir í kvöld verða snilld, lofa því :-) Klukkan 20.00 í Salnum í Kópavogi. Ekki missa af þessu!

potast inn tenglarnir, einn enn nýr, hún Anna Sigurbjörns hornleikari, byrjaði fyrir hálfum mánuði og virðist ætla að halda út, betur en sumir amk. Velkomin í samfélagið ;-)

súra rsk síða

var að reyna að komast inn á þjónustusíðuna með glænýja leyninúmerinu mínu og hún vill ekki taka það gilt. Eins gott að ég er ekki að gera þetta á síðustu stundu. Hef alltaf farið niður á toll og borgað hjá gjaldkera, loksins að reyna að tölvuvæða pakkann hjá mér og þá kemst ég ekki einu sinni inn á síðuna.

jæjajá. Farin að sinna tónfræðigríslingunum.

Finnur virðist loksins vera kominn yfir þetta eyrnavesen, enga bólgu að sjá og eyrað þurrt í morgun. Hann á tíma hjá hne-lækninum á morgun, reyndar aðallega til að tékka á hinu eyranu, það var nebbla fullt af vökva síðast, en lokað. Ef læknirinn vill láta hann í nýtt rör verð ég ekki glöð. Reyni trúlega að fá því frestað eitthvað, strákræfillinn og við alveg búin að fá nóg af þessu veseni.

nú myndi ég fara niður að sofa ef ég nennti að standa upp frá vélinni...

Ég var víst að lofa plöggi hérna áðan. Hér kemur:

Á þriðjudaginn kemur verða haldnir snilldartónleikar í Salnum í Kópavogi. Tveir af efnilegustu söngvurum landsins, ein tilnefning til tónlistarverðlauna þar að baki (mér fannst hann hafa átt að vinna, sko!) Hér eru nánari upplýsingar, en fyrir þá sem nenna ekki lengra koma helstu upplýsingar hér að neðan.

Hallveig ofursópran og Eyvi gullbarki ásamt Árna Heimi píanósnillingi halda tónleika með íslenskum sönglögum, allt frá Sigfúsi Einarssyni til undirritaðrar og Tryggva Baldvinssonar. Flott prógramm, brot af því besta - Pottþétt klassík 2005 eða eitthvað svoleiðis?

verið þar eða verið snar...

fjári eru þetta annars góðir dúettar hjá mér :-)

aaahhh, mikið er gott að fá svona algjöran letidag inn á milli. Bókstaflega ekkert búin að gera í dag nema lesa og borða. Drattaðist á fætur um þrjúleytið, þarf að fara með Freyju að spila á tónleikum klukkan 5 og svo rétt að kíkja á æfingu hjá Hallveigu, Eyva og Árna Heimi á eftir (hmm, letidagur?) Hlakka annars ekki smá til tónleikanna á þriðjudaginn. Nánara plögg í kvöld, ég er farin að lesa aftur.

jæja, afmæli lokið. Gekk bara fínt, um að gera að moka öllum í sund og láta þær sprikla og hamast þar, þá verður þetta mun rólegra er heim kemur.

Kakan var fín, eins gott, maður! Það sást ekki einu sinni neitt að hún hefði fallið, kremið aðeins þykkara í miðjunni reyndar. Verst að ég veit ekki fyrir hverjum ég var að fela þetta, allt fullorðna liðið sem mætti í afmælið les bloggið mitt og ég búin að kjafta frá. Tja, nei, reyndar ekki tengdó, ókei.

ég ætla samt að kaupa mér nýja eldavél. Þessi fylgdi með þegar við keyptum íbúðina og hún var sko ekki ný þá heldur. Alveg kominn tími.

urr, súkkulaðikakan mín féll. Allt Birni Friðgeiri að kenna ;-)

nei annars, það er ofninn minn sem er sökudólgurinn. Ekki nokkur leið að stilla hitann almennilega, sveiflast upp og niður eins og ónefndar óperusöngkonur með skjálftavirkni í toppi. Þetta gerir útslagið, ný eldavél hér inn, ekki síðar en í haust. Langar í gas en það er trúlega of flókið hjá okkur.

kakan verður nú samt góð, ég sneið hana til og lyfti upp miðjunni. Nánari fréttir eftir afmæli.

Fífa varð í þriðja sæti í upplestrarkeppninni í sínum skóla. Er varamaður í stóru keppninni. Mamman var ekki smá montin og með kökkinn í hálsinum í Austurbæjarskóla í dag :-) Svo er bara að finna einhvern bully úr 10. bekk til að ógna öðru hvoru hinna, svo hún komist nú pottþétt í aðalkeppnina :-D

sendi Jóni Lárusi SMS áðan, sagðist langa í bjór - hint hint, viltu fara að kaupa bjór 'skan?

fékk prontó til baka: Búinn að kaupa.

ohhh, ég á bara besta mann í heimi :-)

En við þurfum að vinna fyrir bjórnum, afmælisveislan hennar Freyju er klukkan hálftvö á morgun, íbúðin í rúst og við ekki farin að baka eina einustu köku. Klikkar reyndar með Sundhöllina, hún er víst lokuð á morgun. Verðum að selflytja krakkana í Vesturbæjarlaugina, vil frekar fara þangað heldur en í Laugardalinn, mun auðveldara að hafa yfirsýn yfir hóp af ormum vesturfrá.

Tékkaði ekki einu sinni á þessu með Sundhöllina, hún hefur stundum verið lokuð vegna sundmóta en síðan innilaugin í Laugum var tekin í notkun höfum við þóst vera örugg með Sundhöllina. En á morgun er víst dýfingakennsla þar. Vesen.

hann bróðir minn var að tala um bjánaganginn í sambandi við söluna á símanum. Ég skrifaði heillangt komment á það og birti það bara líka hér.

hálfvitar

þetta eru hálfvitar

By definition svo gott að ríkið sé að losa sig úr þessum rekstri sem er í samkeppni og á þessvegna sjálfkrafa að vera einkarekinn. Ég hef aldrei skilið hvers vegna. (jú, hef heyrt að þetta sé ekki sanngjarnt gagnvart samkeppnisaðilum, en hey, þeir kusu sjálfir að stofna fyrirtækin sín). Líka það að einkaaðilar hljóti alltaf að reka hlutina betur og hagkvæmar heldur en opinberir.

sorrí, þetta á sums staðar við en alls ekki alls staðar. Skoðið lestirnar í Bretlandi til dæmis. Þetta er líka þvílíkt kjaftshögg í andlitið á þeim opinberu starfsmönnum sem stunda starf sitt af alúð og bestu getu, fullt af þeim út um allt. Og jafnvel þó þetta væri rétt, þá er ég bara alveg til í að borga aðeins hærri gjöld af símanotkun minni og að hagnaðurinn renni í sameiginlega sjóðinn heldur en að borga heldur minna til að fylla vasa einhverra fjármagnsmógúla út í bæ. Á líka eftir að sjá símareikninginn minn lækka eitthvað að ráði.

Það á allt að selja sem getur mögulega skilað hagnaði, svo situr ríkið uppi með heilbrigðis- og skólakerfið og við uppi með skattana.

bylting, það er það sem við þurfum...

Við gamla settið vorum með svið í matinn en krakkarnir fengu pizzu.

Nei nei, það er ekki vaninn hér á bæ við áttum bara einn haus og honum var ekki skiptandi á milli 5 manns. Krakkarnir urðu reyndar ekkert fúl, það verður að viðurkennast, þó þau hefðu nú alveg látið sig hafa það að borða sviðin...

Finnur búinn að fá hádegisskammtinn af meðalinu, verðlaunablandípokinn var að verða búinn þannig að ég fór í Drekann að kaupa meira. Rekst þar á uppáhalds nammið mitt, kolfell náttúrlega og nú sit ég og ét af verðlaununum barnsins. Ljóta mamman...

litla skotta átti níu ára afmæli í gær, haldið upp á það á laugardaginn, allar bekkjarsystur + vinkonur fyrst í sund og svo hingað heim í pizzu og ræskrispískökur. Alsæl. Fékk náttúrlega afmælisgjöfina frá okkur í gær, útvarp og geislaspilara. Getur loksins hætt að fá Fífu spilara lánaðan.

Fullt að gera hjá henni annars, spilar á tónleikum með hljómsveitinni sinni á sunnudaginn, sýning í jassballettflokknum á miðvikudaginn. Blómstrar.

hvað er eiginlega með þetta veður :-@ Aumingja rifsberjarunnarnir mínir, nýklipptir og fínir og farnir að bruma sig þvílíkt.

ég var dauðfegin að vera á nagladekkjum í útkeyrslunni í gær. Hefði örugglega runnið utan í á einum stað, annars. Hlýna, hlýna, plís...

það lekur enn úr eyra :-( mér er hreint ekki farið að standa á sama um þetta.

þetta verður gaman :-)

útkeyrslu andsk....s lokið, í bili amk. Frá Grafarvogi gegn um Garðabæ, Kópavog, heim aftur að skipta um bíl (helmingurinn af vörunum var í hinum bílnum sko) Fossvogur, Frostaskjól. Fjórir staðir eftir, Breiðholt og Hafnarfjörður, það eru samkennarar mínir, ætti að ná þeim á morgun, Selfoss slepp ég við, kórfélagi, fær á næstu kóræfingu og svo einn Hlíðabúi sem var ekki heima. Gott mál. Frökenin gat selt fyrir rúmlega 68 þús kall, ekki slæmt hjá henni. Tvöfalt magn á við síðast. Sú sem seldi mest fór yfir hundraðþúsundkallinn, ekki vildi ég þurfa að keyra það út. Og hreint ekki í þessu veðri.

og nú er ég búin að vinna mér inn fyrir rauðvínsglasi (ha, ég? nóg um helgina? fær maður einhvern tímann nóg rauðvín?)

árans ræktin

ég er gersamlega að leka niður. Spurning hvernig ég komist í gegn um daginn, kenna og svo keyra út þessi lifandis ósköpin af klósettpappír/eldhúsrúllum/þvottavéladufti sem sú elsta er búin að selja svo hún komist til Spánar í sumar með kórnum. Garg

jæja, best að drífa sig í leikskólann að gefa barninu meðalið. Öppdeit, lak ekkert úr eyranu á honum í morgun, fyrsta skipti í nærri 4 vikur. Vonandi er þetta nú að koma.

frönsk músík á æfingunni í kvöld, Debussy (fallegur og skemmtilegur) og Poulenc (hrmm, erfiður en kemur til) Veit ekki hvað hann var eiginlega að pæla á sumum stöðunum, línurnar gersamlega út í hött. Endalaus hopp upp og niður, stórfurðuleg tónbil. Eins gott að maður er fúllbefaren í Modus novus (einni andstyggilegustu tónheyrnarbók skrifaðri - hehe, ég er einmitt að pína Finnboga og Tótu með henni núna í tónheyrn 6. Finnbogi er reyndar að syngja með í þessu og ég held hann sé farinn að skilja mikilvægi æfinganna...

svona til að tala um eitthvað annað, við prófuðum nýja uppskrift í gær, úr dönsku kellingablaði sem ég laumast til að kaupa. Ekki smá góð, sinnepssteiktar kjúklingabringur með indverskri sósu og steiktum eplabátum. Setti uppskriftina hérna ef einhver hefur áhuga.

Sé fram á það að þurfa að skjótast í leikskólann um miðjan dag alla þessa viku, til að gefa Finni meðalið sitt. Komnar einhverjar reglur sem segja að starfsfólk leikskólans megi alls ekki gefa börnunum meðul, veit ekki hvenær þær komu. Mig minnir endilega að Fífa hafi einhvern tímann þurft að fá meðal í leikskólanum og að það hafi ekki verið neitt mál. En það vill til að ég get alveg gert þetta, þarf ekki að skjótast úr vinnu eða neitt þannig, byrja aldrei að kenna fyrir klukkan 2.

lekur annars enn úr eyranu á honum, framhaldssagan orðin ansi löng (fer að verða hrædd um að fólk nenni engan veginn að fara inn á síðuna lengur, þetta er orðið svo leiðinlegt hjá mér...)

það fuku nokkrar rauðvínsflöskur þarna í gærkvöldi. Snilldarpartí. Skemmtilegt fólk, verst samt að það komust ekki alveg allir. Næst, bara...

Eyddi þynnkunni í að glotta að óförum Ferrari í formúlunni, ágætt að leggjast undir sæng og horfa á bíla keyra í hringi. Sofnaði reyndar yfir hluta af keppninni.

fór ekki á tónleikana, sorrí bróðir. (skæl). Var að hugsa um það þar til ég spurði Jón Lárus hvort ég væri ekki ægilega leiðinleg að stinga af frá undirbúningnum að partíinu sem nóta bene ég er að halda fyrir mína vinnufélaga og skilja hann eftir með tiltektina. Jón sagði uuu...

það verður nú trúlega jóhannesarpassíon eftir þessa, samt.

æji

ég get ekki ákveðið mig hvort ég á að fara á tónleikana hjá Langholtskórnum og Þorbirni klukkan 6, mig dauðlangar en ég er búin að bjóða rauðvínsklúbbnum í partí í kvöld og vil nú helst vera komin heim þegar þau koma. Myndi nú trúlega ná því en þetta er ansi hreint tæpt.

rakst á snilldarfærslu hjá hvíta bloggaranum, bara verð að birta þetta:

Dagur í lífi Nonna

Nonni er frjálshyggjumaður. Hann vaknar kl. 7 um morguninn og hellir upp á morgunkaffið. Hann fyllir kaffivélina af hreinu drykkjarvatni af því að einhver ríkisafskiptasinni setti það í hegningarlög að það væri ólöglegt að menga drykkjarvatn. Hann tekur lyfin sín með morgunmatnum, og hann getur treyst því að þau séu örugg og virki alltaf rétt vegna þess að einhver vinstri fasisti kom á fót lyfjastofnunum til að tryggja það að verkun lyfsins, gæði og öryggi séu í samræmi við það sem er auglýst. Nonni borgar bara 1.200 krónur fyrir lyfjapakkningu með mánaðarskammti en ekki 12.000 vegna þess að einhver ríkisafskiptasinni barðist fyrir því að Tryggingastofnun tæki þátt í lyfjakostnaði sjúklinga.

Nonni fer í sturtu og setur sjampó í hárið. Sjampóflaskan er merkt með hverju einasta innihaldsefni, og öll hafa þau verið prófuð vegna þess að einhver forsjárhyggjumaður ákvað að hann hefði rétt til að vita hvað hann væri að setja á líkama sinn. Nonni klæðir sig, fer út og andar að sér hreinu lofti af því að einhver fóstrufasisti í útlöndum barðist fyrir því að setja lög til að takmarka útblástur frá bílum, skipum og verksmiðjum.

Nonni stimplar sig inn á vinnustaðnum sínum. Hann er í góðri vinnu og fær góð laun, launað sumarfrí, veikindadaga, hádegismat og yfirvinnuna sérstaklega borgaða af því að einhverjir kommúnistar helguðu líf sitt því að berjast fyrir starfskjörum hans. Vinnuveitandi Nonna myndi hugsanlega breyta þessum skilmálum ef starfmenn ættu ekki möguleikann á að kæra hann eða tala við trúnaðarmann verkalýðsfélagsins. Ef Nonni slasast í vinnunni, missir geðheilsuna eða bara missir vinnuna þá fær hann bætur frá ríkinu vegna þess að einhver vinstri vitleysingur var þeirrar skoðunar að hann ætti það engan veginn skilið að missa heimili sitt út af tímabundnum mótbyr.

Í hádeginu fer Nonni í bankann og borgar reikninga. Millifærslur Nonna eru verndaðar með lögum um greiðslufyrirmæli og af Fjármálaeftirlitinu vegna þess að einhver allaballi taldi rétt að verja peninga Nonna fyrir óheiðarlegum bankamönnum sem sums staðar hafa lagt bankakerfi heilu ríkjanna í rúst. Nonni þarf að borga af ríkisniðurgreidda námsláninu sínu vegna þess að einhver vinstrimaður ákvað að bæði Nonni og ríkið yrðu betur sett ef Nonni gæti sótt sér menntun og þénað meiri peninga.

Eftir vinnu fer Nonni að heimsækja pabba sinn, sem er bóndi á Suðurlandi. Vegurinn sem hann keyrir eftir, rafmagnið, hitalögnin, vatnslögnin, símalínan og sjónvarpssendirinn í sveitinni hefði aldrei verið komið á nema af því að einhver sósíalisti greip inn í gangverk markaðarins og krafðist þess að dreifbýlið fengi sömu grunnþjónustu og þéttbýlið. Hann er ánægður að sjá pabba sinn, sem lifir á ellilífeyri frá ríkinu og greiðslum úr Lífeyrissjóði bænda vegna þess að einhver velferðarkrati tryggði að Nonni þyrfti ekki að framfleyta honum, heldur gæti pabbi hans framfleytt sér sjálfur burtséð frá því hvernig aðstæður voru á meðan hann var á vinnumarkaðnum.

Þegar Nonni kemur heim kveikir hann á tölvunni sinni og rúntar um vefsíður frjálshyggjumanna, sem tala um minna ríkisvald, lægri skatta, færri reglur og einkavæðingu sem lausn á öllum vandamálum heimsins. Nonni er líka alveg sammála - "við þurfum ekki þetta ofvaxna ríkisvald til að skipta sér af okkur, ég hef unnið fyrir öllu mínu sjálfur og mér finnst að allir eigi að taka fulla ábyrgð á sjálfum sér, alveg eins og ÉG."

(Þessi pistill er þýddur og staðfærður. Nöfnum hefur verið breytt.)

og eyrnabólguframhaldssagan heldur áfram. Litli gutti er enn ekki laus, nú er hann kominn á sérsniðið lyf, ekki þó í æð. Diclocil, fjórum sinnum á dag í heila viku. Ræfillinn litli. Við gætum þurft að senda hann með lyfið í leikskólann, ekki séns að gefa honum fjórum sinnum hér heima.

vá hvað fyrrverandi tilvonandi fréttastjórinn er ÓGEÐSLEGA fúll :-D Talar um að að hans persónu hafi verið ráðist á ógeðfelldan hátt og hann troðinn niður í svaðið. Missti ég af einhverju? Varð að minnsta kosti aldrei vör við neitt slíkt. Þeir sem ég heyrði tjá sig töluðu allir bara vel um þennan strák, nema að því leyti að hann hafi litla reynslu af fréttamennsku, nokkuð sem hann getur ekki neitað. Þeir sem var ráðist á var útvarpsstjóri, verðskuldað, og svo formaður útvarpsráðs. Ég hafði fulla trú á því að þetta væri bara hinn hæfasti og vænsti maður, alveg þangað til ég las þessa yfirlýsingu en missti satt að segja allt álit á honum þá.

Gott að hann hætti við, samt, enda hefði honum aldrei verið vært þarna. Hvað ætli gerist núna? Auglýst upp a nýtt, eða einhver af hinum umsækjendunum ráðinn?