<$BlogRSDUrl$>

2005-02-28

aldrei hélt ég að ég myndi lenda í þessu!

ég er komin í einkaþjálfarahlutverk fyrir manninn minn. Hann er í Líkami fyrir lífið átaki í vinnunni hjá sér, nýkominn þessi líka fíni líkamsræktarsalur. Jón Lárus er í fínu formi, hleypur mikið og spilar fótbolta en hann hefur aldrei prófað að lyfta. Þannig að þegar þetta átak var sett af stað í vinnunni, sló hann til.

Bara fínt, nema það vantar algerlega inn í þetta teygjurnar. Ekki einu sinni teygjuplakat uppi á vegg. Þannig að þegar hann kom heim eftir fyrsta skipti, spurði ég hann hvort hann hefði nú ekki teygt vel. Svarið var: uuuu... Ég spurði hvort hann hefði teygt eitthvað. Sama svar. Ég spurði hvað hann héldi eiginlega að hann væri að gera! Rak hann í hörku teygjuprógramm, held að ég hafi bjargað lífi hans næstu daga með þessu.

Einn í vinnunni varð að fara heim aftur í dag, hann gat ekki unnið vegna kvala af harðsperrum...
OBITUARY


Today we mourn the passing of our beloved old friend, Mr. Common Sense.


Mr. Sense had been with us for many years. No one knows for sure how old he was since his birth records were long ago lost in Bureaucratic RedTape. He will be remembered as having cultivated such value lessons as knowing when to come in out of the rain, why the early bird gets the worm and that life isn’t always fair.


Common Sense lived by simple, sound financial policies (don’t spend more than you earn) and reliable parenting strategies (adults, not kids, are in charge). His health began to rapidly deteriorate when well intentioned but overbearing regulations were set in place. - Reports of a six-year-old boy charged with sexual harassment for kissing a classmate; teens suspended from school for using mouthwash after lunch, and a teacher fired for reprimanding an unruly student, only worsened his condition. Mr. Sense declined even further when schools were required to get parental consent to administer aspirin to a student; but could not inform the parents when a student became pregnant and wanted to have an abortion.


Finally, Common Sense lost the will to live as the churches became businesses; and criminals received better treatment than their victims. Common Sense finally gave up the ghost after a woman failed to realize that a steaming cup of coffee was hot, she spilled a bit in her lap, and was awarded a huge settlement. Common Sense was preceded in death by his parents, Truth and Trust, his wife, Discretion, his daughter, Responsibility, and his son, Reason. He is survived by two stepbrothers, My Rights and Ima Whiner. Not many attended his funeral because so few realized he was gone.


If you still remember him, pass this on; if not, join the majority and do nothing.

(frá Eyva þangað frá Iðunni sem aftur veiddi það annars staðar, veit ekki hver á þetta upphaflega)
Við Finnur erum komin með magapest, ekki gaman. Annars veit ég ekki hvað það er með drenginn, hann gubbar á sirka tveggja vikna fresti, eina gusu, eiturhress á eftir, heima einn dag, ekkert að honum. Þetta er held ég fjórða eða fimmta svoleiðis tilfellið, síðast var það nóttina fyrir öskudag, eins og minnuga lesendur kannski rámar í.

En kannski er þetta önnur pest núna, ég er amk líka lasin í þetta skiptið...

2005-02-27

matarboð tókst um það bil fullkomlega, forréttur úr nýju fiskbók Hagkaupa, bara fínt, of mikill laukur samt, á eftir að aðlaga hann okkar smekk, verði hann endurtekinn. Sveskjusvínið (Porc aux pruneaux) tókst fullkomlega í þetta sinn, nóg eftir líka fyrir matinn annað kvöld. Snilld. Og svo var súkkulaðikakan frá henni Hallveigu fullkomin að venju, bara með þeyttum rjóma og jarðarberjum. Buðum upp á Tokaji desertvín með kökunni, hugsa nú samt að ef Hallveig hefði verið á svæðinu hefðum við ekki sloppið við að hafa kaffi líka...

Yngri krakkarnir spiluðu fyrir matargestina við góðar undirtektir. Fífa sleppti því í þetta sinn. Freyja vildi hins vegar bæði spila og dansa; fékk að sjálfsögðu leyfi til þess. Ekki sviðsfeimin, stúlkan sú.
ég ætlaði sko ekki að vera til fimm, nei nei! ég? Að sjálfsögðu komum við heim klukkan fimm. Langt síðan maður hefur haft svona mikið úthald.

Kjúklingavængirnir voru fínir, geri þetta örugglega aftur einhvern tímann. Verð að kaupa þessa ananaschilisósu aftur, hún gefur ansi gott bragð.

Svo er bara að koma sér í stuð til að elda, ekki aaalveg upp á okkar besta...

2005-02-26

ó nei!

missti af þessum tónleikum. Hafði ekki hugmynd um að þeir væru í dag. Sorrí Tryggvi, ætlaði þvílíkt að mæta. Var þetta tekið upp? plís?
Búin að grilla kjúklingavængi fyrir partíið í kvöld, henti saman barbíkjötsósu, sojasósu, púðursykri og smáræði af ananas- og chilisósu sem ég átti inni í skáp. Ilmar amk afskaplega vel, tilkynnist á morgun hvernig útkoman varð.

Já, eins gott að borga óperumiðana, svo við missum ekki afsláttinn, úff. Farin.

2005-02-25

Kórpartí annað kvöld, snilld. Verst að við erum búin að bjóða fólki í mat á sunnudagskvöldið þannig að við verðum varla til 5 eins og stundum...
Snilldarinnar veður, svolítið svalt þó. Fór með vinkonu minni út að borða, töltum niður í bæ heiman frá mér. Fórum í Iðuhúsið, fengum þokkalegasta salat. Var reyndar eiginlega jafnsvöng eftir og fyrir. Kom upp úr kafinu að hún hefur aldrei borðað á Kaffibrennslunni, ákváðum að fara þangað næst.

Strákurinn hennar á að fermast eftir 3 vikur og hún var að tala um hvað þetta væri orðin mikil bilun. Allt þetta dæmi í kring um fermingar. Sagðist vera þessi ósköp fegin að hann vill ekki sjá sérprentaðar servíettur né boðskort (settist niður um síðustu helgi og hringdi í þá sem átti að bjóða), veislan verður haldin heima og heimagerðar veitingar. Svona myndi ég helst vilja gera þetta, ef krakkarnir mínir vilja fermast.

amk ekki að ræða það að senda liðið í strípur, plokkun, augnháralitun og ljós!

2005-02-24

Flensborgarkórverkið á leið til stjórnanda, gott mál. Ætla samt ekki að skála fyrir því, ekki nammidagur í dag :-(
sótti Skype áðan en veit ekkert hvort ég geti notað það, ég held að það sé nebbnilega ekki míkrófónn á Cube. Hmmm. Hlýt að geta fengið svoleiðis, ekki viss samt, verður að vera usb, ekkert audio in á henni. Eini gallinn við þessa tölvu...
stóra skutlið klikkaði, ég fór með Finn í tímann í stað pabba hans, vorum örlítið fram yfir tímann; ég kom svolítið seint að sækja Freyju í skólann, fann hana hvergi, hélt hún hefði farið heim, engin Freyja þar, hringdi í allar vinkonur, hvergi Freyja, ég orðin dauðstressuð, skildi ekki hvers vegna hún hefði ekki farið heiim til bestu vinkonu sinnar, eða þá til vinar síns sem á heima hér í bakhúsinu, en þá var hún bara enn í skólanum og beið eftir mér, greyið. Missti af dansinum og ég þá af ræktinni. Svona þegar rútínan riðlast.
Vorboðinn ljúfi mættur

götusóparabíllinn kominn í gang.
Er að leggja lokahönd á kórverk fyrir Flensborgarkórinn, ógurlegt draugastykki. Svo er að reyna að klára dúett númer 2, hann verður nokkurn veginn strófískur, 7 vísur um heilbrigð hjón. Þá bara Vídalínsmessan aftur, nóg að gera, sko :-) Er örugglega líka að gleyma einhverju - já, lag fyrir Kvennakór Hafnarfjarðar líka og svo fleiri útsetningar. Vissi það.

2005-02-23

Það er flókið að vera bara á einum bíl.

Fimmtudagarnir eru verstir. Þá þarf Jón Lárus að hafa drossíuna þar sem hann fer með litla gutta í víólutíma klukkan kortér yfir tvö. Þegar hann er búinn er brunað með stráksa aftur í leikskólann, Freyja sótt í skólann, ég hingað heim, Jóni skutlað aftur í vinnuna, ég og Freyja inn í Sporthús þar sem hún er í jassballett og ég í ræktinni á meðan. Að því loknu sækjum við Freyja Finn aftur í leikskólann, skutlum Fífu í kór inn í Langholtskirkju (þessum lið mætti reyndar sleppa, Fífa getur alveg tekið strætó, en þetta er bara alveg í leiðinni) og að síðustu sækja Jón í vinnuna.

Á morgun flækist málið enn frekar þar sem ég á að mæta á kennarafund í Suzukiskólanum klukkan 9, á sama tíma og Finnur mætir í leikskólann. Ég er ekki enn búin að finna út úr því hvernig við leysum þetta. Leigubíll, trúlega...
tek undir með litla bróður, þessi grein hans Hnakkusar er tóm snilld!
Páskaliljurnar farnar að stinga upp kollunum í garðinum, athuga hvort öllu sé óhætt. Mikið væri nú gaman ef það kæmi ekkert illilegt kuldakast og við fáum blómstrandi páskaliljur í dymbilvikunni eða svo

já já, maður má nú láta sig dreyma...

2005-02-22

undarlegt veðurfar, þoka og logn í þrjá daga samfleytt hér í hovedstaden. Komin skán á Tjörnina, þrátt fyrir að það sé nú varla frost, bara engin hreyfing á vatninu til að hindra ísmyndun.

Þriggja tíma þjóðdansamaraþon hjá mér í dag, geri aðrir betur. Sama á morgun, ég þarf ekki að hafa samviskubit yfir hreyfingarleysi þessa vikuna.
tveir nýir tenglar, hún Kibba og svo Helga kollegi fyrir norðan.
mikið voðalega hrúgast launamiðarnir hér inn. Ég held alltaf að nú hljóti ég að vera búin að fá þann síðasta. Endurskoðandinn minn fær slatta að blaða í...
híhíhí
„Eftir hlé var frumflutt nýtt verk eftir nöfnu einleikarans, Rondo burlesco (6'); skemmtilega andrúmsrík lítil smíð með e.k. "djöfla-ondeggiando" sem A-kafla innan um aðra öllu rómantískari. Engu líkara en Tevje mjólkurpóstur væri nú seztur upp á bárujárnsþak í Breiðholti. Lukkaðist sú sjósetning með ágætum,..." segir Ríkharður Örn í fínum dómi í Mogga í dag. Ekki kvartar maður. Hilda fékk líka mjög lofsamlega dóma þannig að við nöfnurnar getum bara verið mjög sáttar.
nýtt verk og mjög skemmtilegt verk... segir Halldór Hauksson í Víðsjá í gær, um fiðluverkið sem var frumflutt á laugardaginn, almennt ánægður með tónleikana, finnst Hilda ekki alveg ná utan um Bach partítuna, enda eitt erfiðasta sólófiðluverk samið, en að öðru leyti ánægður. Finnst reyndar þriðji kaflinn í Hafliða langdreginn. Það er amk eitt sem er ekki hægt að segja um verkið mitt, það er ekki langdregið :-)

2005-02-21

unhvur útlendingur niðri í þvottahúsi hjá mér að tengja ljósleiðarakapalinn fyrir orkuveituna. Hvað gerir maður eiginlega með það? Eru þeir komnir með einhverja þjónustu í ljósleiðarakerfinu eða er bara verið að tengja þetta til að geta mögulega sent um þetta einhver gögn einhvern tímann síðar?

Einu sinni vann ég hjá Rafmagnsveitunni. Það var gott fyrirtæki og vel rekið, með snilldar starfsmannastefnu. Svo var þetta allt sameinað undir Orkuveituhatt, einhverjir vatnskettir settir yfir og Alfreð vinur tók taumana. Heimur versnandi fer...
Þemavika í Hafnarfirði, við verðum að spila og dansa þjóðdansa, einn tónfræðakennarinn sér um það. Ég er ekki neitt sérlega flink að dansa eða læra spor, verð örugglega lengur en krakkarnir að læra þetta. Fjör! (arrgh)

uss nei annars, þetta verður örugglega bara gaman. Vorum með svona þemaviku í fyrra líka, þá var það slagverksnámskeið. Gott að brjóta kennsluna svona upp, krakkarnir tóku tónfræðaprófin í síðustu viku, gott að vera (nærri) búinn með þann pakka.

2005-02-20

Fjölskylduferð í bíó áðan, sáum The Incredibles. Snilld. Sá diskur á eftir að detta hér inn þegar hann kemur út. Allir höfðu gaman af, líka Finnur þó hann næði reyndar ekki alveg að fylgja textanum (mamma hans og elsta systir harðneituðu að sjá útgáfuna með íslensku tali. Nægur tími til þess þegar dvdiskurinn kemur.

2005-02-19

Tónleikarnir gengu svona líka bara ljómandi vel, verkinu vel tekið. Húsið náttúrlega afskaplega harkalegt við flytjendur, hjálpar manni ekki neitt. Allt heyrist, ekkert hægt að fela með akústík. Hnökrar voru reyndar afskaplega fáir, sérstaklega miðað við lengd og erfiðleikastig, flottur fiðlari hún Hilda.

Leikmyndin úr öðru leikritinu sem er verið að sýna á nýja sviði var uppi, svolítið flott.
frumflutningur á eftir, 15.15 í Borgarleikhúsi, hlakka til.
Gneisti með snilldarfærslu í dag.

2005-02-18

Mugibaby er alveg flottur lítill ungi :-)
var í tómu rugli niðri á Laugavegi áðan. Fór til að kaupa sængurgjöf handa litla stráknum hennar Rúnu sem syngur með mér í Hljómeyki. Byrjaði í Vínberinu, keypti fínan konfektkassa handa foreldrunum. Borgaði með mínu eigin korti í stað Hljómeykiskortsins. Nú, jæja, lítið mál að leiðrétta það. Fór svo niður í DPAM til að kaupa eitthvað á litla guttann. Þar var afgreiðslan í tómu rugli, sló inn vitlaust og gleymdi að láta mig borga í sitt hvoru lagi (keypti líka náttföt handa Freyju og kórinn á víst ekki að borga þau) Nú þarf ég sem sagt að fara að reikna, + útskýra fyrir gjaldkera kórsins hvað allar þessar færslur fram og til baka á reikningnum þýði eiginlega.

Á leiðinni milli Vínbersins og DPAM gekk ég annars fram á tvær konur, önnur faðmaði hina að sér, með skelfingarsvip og þegar ég gekk framhjá heyrði ég hana segja :Guð minn góður. Drama út um allt í kring um mann án þess að maður hafi hugmynd um...
Ég hef greinilega ekki tekið alveg nógu mikið á í Sporthúsinu í gær, eða þá að teygjurnar hafa heppnast fullkomlega, smá strengir í lærvöðvum en annars finn ég ekki fyrir neinu. Og ég sem var ekki búin að fara í amk mánuð.

2005-02-17

Frumraun þess fjögurra ára í sögusmíðum:

Einu sinni var álfur sem á heima í steini. Endir

Sló þetta alveg sjálfur inn, með smá stafsetningarleiðbeiningum, ekki mjög miklum þó.

mont, mont :-)
æ, það var svo sorgleg jarðarför sem við vorum að syngja við áðan. Ungur maður með 3 ung börn. Átti verulega erfitt með mig þegar var verið að rétta börnunum blómvendi til að bera út á eftir kistunni. Sem betur fer vorum við búin með okkar hlutverk þá.
Arrg! Hún Olga, klipparinn minn er hætt, trúlega flutt til Eistlands með kærastanum.

hvert fer ég þá?

2005-02-16

Var að hlusta á hana Hildigunni frænku mína Halldórsdóttur spila yfir prógrammið sitt, sem hún flytur á 15.15 tónleikum í Borgarleikhúsinu á laugardaginn var (klukkan hvað? jú, 15.15, hehe) Hvet fólk til að mæta, flott prógramm og fínn flutningur hjá henni. Ekki skaðar að hún er að frumflytja eftir mig lítið verk, Rondo burlesco, tekur um 6 mínútur.

Hitt á efnisskránni er Telemann fantasía (hmm, var það Es-dúr? man ekki), Bach partíta í d-moll (þessi með stórkostlegu Chaconnunni), þessi tvö verk eru spiluð á barrokkfiðlu, síðan eftir hlé er mitt verk og svo Offerto eftir Hafliða Hallgrímsson, ekkert smá magnað verk. Var skíthrædd um að litla verkið mitt yrði eins og krækiber í helvíti innan um þessa stórlaxa, en eiginlega er það bara ágætis brú frá barrokkinu yfir í Hafliða - eða það finnst mér :-)
Búin að bóka ferð til Ítalíu í sumar, Króatía kláraðist, ætluðum eiginlega þangað. Var nóg pláss á föstudaginn var en það hafa greinilega ansi margir verið að skoða bæklinginn í góða veðrinu um helgina og pantað sér far í sólina. Allt búið á mánudeginum. En hei, ég held að Rimini sé meira spennandi kostur, miklu meira við að vera þar. Svolítið dýrara, þó, ferðin svipuð en mun dýrara að lifa á Ítalíu.
Það væri synd að segja að ég hlakki til að keyra inn í Hafnarfjörð á eftir. Best að leggja vel snemma af stað og lúsast þetta.
Útstáelsi á okkur. Bæði búin að kaupa miða á Óliver fyrir alla fjölskylduna, og svo á Toscu fyrir okkur Jón Lárus og Fífu. Vá hvað ég hlakka til :-)
enn er Sjálfstæðisflokkurinn í borgarstjórn að snapa upp allt sem er mögulega hægt að væla um.

nú eru það kettirnir. Mér líst vel á þessar reglur sem á að setja, lausaganga leyfð en skylda að eyrnamerkja og skrá ketti, og svo að gelda högna.

sjallarnir væla yfir óréttlæti þess að þeir sem eigi læður þurfi ekki að láta kippa þeim úr sambandi og svo vilja þeir ekki láta skrá kettina, þar sem það sé augljóslega verið að búa í haginn fyrir seinni tíma skráningargjald. Ekkert að spá í að bæði er ófrjósemisaðgerð á læðum mun dýrari og miklu meiri aðgerð en fyrir högna, og svo það að læður eru ekki mikið í því að merkja sér svæði með tilheyrandi fýlu. Eyrnamerking og skráning er frábær leið til að finna kisuna sína aftur/kattarræfillinn að komast heim, skyldi dýrið týnast, ásamt því að vera stór plús fyrir borgina (=skattgreiðendur), mun einfaldara að koma týndum dýrum á sinn stað), sem sagt gott fyrir alla aðila. Ég skal hins vegar taka undir mótmælin þegar/ef að því kemur að skráningargjald liggi fyrir.

mín læða er bæði eyrnamerkt og skráð + tekin úr sambandi. Dettur ekki annað í hug.

2005-02-15

Hananú

nú hefur Finni (líklegast) tekist að hella einhverju niður í lyklaborðið mitt. 4, 5 og 6 virka ekki, heldur ekki ör upp og hægri hástafatakki. Væri þolanlegt nema vegna þess að ég nota talnatakkana með hljómborðinu til að slá inn nótur. Hægt, en pirrandi með talnaröðinni fyrir ofan stafina.

Við erum alltaf að setja regluna: Ekki drekka neitt við tölvuna, en þar sem ég er alltaf að brjóta hana sjálf er svolítið erfitt að halda sér fast í hana...

2005-02-14

Prófavika hjá krökkunum í Hafnarfirði núna, alltaf þægilegt að þurfa ekkert að vera að eipa uppi á töflu. Best að taka með eitthvað að lesa.

Ætlaði reyndar að láta slóðana mína úr Suzuki taka próf í 6. hlutanum í dag, mættu hvorugar. Búnar að vera að slúbbertast í þessum kafla í amk 2 ár ef ekki lengur. Ormar úr Versló. Lenda í vandræðum í vor, fá ekki stigsprófið sitt gilt.
aaahhh! vorum að uppgötva snilldar rauðvín frá Chile, framleiðandinn heitir Cono sur og þrúgan er Carménère. Við eigum nokkur svona uppáhaldsvín í ódýrari kantinum, Vinas del Vero, gewurztraminer hvítvín og merlotvínið frá La Playa, bæði dottin út af lista í ríkinu (grrrr) en hægt að panta samt. Ekki eins og uppáhalds rauðvínið mitt í öllum heiminum, La Rioja alta sem maður getur ekki einu sinni pantað :-( (keypti það úti í London síðast, eigum tvær) Vonandi helst þetta inni. Fer á innkaupalistann að minnsta kosti. Fáránlega ódýrt, kostar bara þúsundogníutíu. (frekar en ellefuhundruðogníutíu) Kaupa kassa...

2005-02-13

2. þáttur af Ørnen búinn, hvað sem tót segir þá eru þetta fínir þættir. Satt samt að íslenskunni hans hrakar óðum, er nú ekki viss um að hann tali íslenskuna með annarri rödd eins og einhver (Nanna held ég) sagði en hann er amk ekki að vanda sig eins mikið með frasana og í fyrsta þættinum.

Ætli hann komist eitthvað til Íslands í þáttunum?

ó mæ god, ég er að blogga um sjónvarpsseríu! öðruvísi mér áður brá...
Tókst loksins að horfa á allar LOTR myndirnar í einni lotu, lengdu útgáfurnar. Tók um 11 tíma, 11 1/2 með einni pizzupásu. Snilldin tær og hrein.

Vinur okkar á mega heimabíó sko, skjá sem er megnið af stofuveggnum, hágæða myndvarpa og hljóðkerfi DAUÐANS. Við sátum þar til við vorum aum í afturendum, stóru stelpurnar sofnuðu í lokin. Skildum reyndar yngri krakkana eftir hjá ömmu og afa, þau hefðu aldrei haldið þetta út.

Gerir maður varla aftur. Annars væri ég til í annað skipti án texta. Var að reyna að fá þetta textalaust en fékk ekki í gegn, út af stelpunum. Ekki að Fífu hefði ekki verið sama, marghorft á myndirnar og mjög góð í ensku, en dætur vinarins ekki eins vel undirbúnar.

2005-02-12

Drukkum P-bjórinn í gærkvöldi. Ekki verstur

Í dag verður langþráð og langplönuð skemmtun hjá okkur. Nánar síðar.

2005-02-11

P-dagurinn er í dag. Við klikkuðum að sjálfsögðu ekki á því.
bættist við ein ný pöntun í gær, en mér sýnist vera búið að létta þrýstingnum af Vídalínsmessunni, verður flutt í haust í stað fyrsta maí. Bara fínt. Hefði alveg klárað en betra svona.

Er að skrifa dúetta fyrir Hallveigu og Eyva. Árni Heimir spilar með þeim á tónleikum í Salnum í apríl. Nota texta úr Vísum fyrir vonda krakka eftir hann Davíð Þór, algjör snilldarbók. Náði loksins í höfundinn og að venju var auðsótt mál að fá að nota vísurnar. Í útlöndum (flestum amk) er þvílíkt mál að fá leyfi til að nota texta, flest þýsk tónskáld eru alltaf að vinna með Schiller og Göthe og alla hina sem eru dottnir úr höfundarrétti, þar sem handhafar höfundarréttar (yfirleitt útgefendur) eru erfiðir og dýrir við að eiga. Þýski prófessorinn minn trúði mér varla þegar ég sagði honum að hér á landi hringdi maður bara í skáldið og fengi leyfi, yfirleitt ekkert vandamál.

Að sjálfsögðu þarf samt að fá leyfi útgefanda hér ef til stendur að gefa verkin út eða dreifa í miklum mæli. Ég sagði við Davíð að ef til slíks kæmi myndi útgefandinn minn tala við útgefandann hans.

2005-02-10

NAUHAUTS!!!
Króatía. Langar til Króatíu í sumar. Málið skoðast.

Langar reyndar ennþá meira til Ítalíu, þabbara svo dýrt :-(
Finnur greyið, á leið í leikskólann áðan, áttaði sig allt í einu á því að hann hafði misst af öskudeginum. Mér fannst það ógurlega sorglegt. Hann hélt að hann gæti bara farið í búningnum núna og nú væri öskudagur. Muuu :-(

2005-02-09

Gettu betur byrjað í sjónvarpinu og þar með þessi óþolandi endalausu hálfvitalegu fögn hjá stuðningsliðunum. Skora á Egilsstaðaliðið að halda aftur af látunum þannig að þátturinn verði amk þolanlegur þar.
Krakkarnir sitja niðri, horfa á barnatímann og getið nú hvað... nammi? naah? er það nokkuð?

en stelpurnar voða góðar og gefa bróður sínum með sér. Mesta furða hvað hann hefur góða lyst.

Og naumast hvað snjóar! hitinn í gangstéttinni hefur ekki alveg undan en munar samt hellingi.
Eldri heimasætan mætt heim með fenginn af Laugavegi: yfir 800 grömm af nammi...

verður gaman að vita hvað sú yngri dregur heim!
kom að því

lasin. Finnur vaknaði í nótt og ældi út rúmið, ég er ekki heldur alveg góð í maganum. Súrt, sérstaklega fyrir litla Spædermanninn minn sem missir af öskudagsballinu í leikskólanum. Er að vandræðast með krakkaræflana mína í Hafnarfirði, sem tóku upprifjunarpróf í síðustu viku, áttu að fá þau til baka í dag til að vita hvað þau ættu að læra fyrir aðalprófið í næstu viku. Verið að reyna að redda málunum fyrir þau. Ætlaði líka að láta þau fá lista yfir ítölsku orðin sem þau þyrftu að læra, svo þau þurfi ekki að leggja á minnið 3 heilar blaðsíður. Nóg samt.

2005-02-08

Hér sit ég, með samviskubit, í staðinn fyrir að vera á hljómsveitaræfingu. Er búin að vera að reyna að ákveða mig síðan á sunnudaginn hvort ég verði með í næsta prógrammi. Dauðlangar til að spila aftur með Danna, hann var fínn þegar hann stjórnaði okkur síðast. Hef hins vegar engan veginn tíma. Niðurstaðan líklega sú að ég ætla að spila mig stóran fiðluleikara, sleppa fyrstu 3 æfingunum en mæta á hinar 3 og tónleika.

Það er að segja ef ég kemst upp með það og þau vilja leyfa mér ;-)
Aðalfundur Íslenskrar tónverkamiðstöðvar í gær, mjöööög fámennt (allir félagar dauðþreyttir eftir törnina/lokapartíið á Myrkum). Ég er í stjórn=skyldumæting. Varð að gefa síðasta bekknum mínum frí, bæti upp síðar. Var fundarritari, náttúrlega þvílík snilldarhugmynd, hef pottþétta afsökun fyrir að vera ekki fundarritari á Tónskáldafélagsaðalfundinum sem nálgast.

Annars sérkennilegt að ég og Elín vinkona höfum skipst á að vera fundarritarar þar síðustu 5 árin amk, er nú eiginlega kominn tími á karlkyns ritara...

2005-02-07

einn skammtur af vatnsdeigsbollum kominn úr ofninum. Skotil.

Svo er bara að búa til jarðarberjarjómann ættaðan frá Nönnu, úr nýjasta Gestgjafanum. Birtur hér Bolluveisla í kvöld :-)
Ekki veik, ósköp fegin. Hefur bara verið eitthvað tilfallandi þarna á laugardaginn.

Ekki búin að baka neinar bollur ennþá, enginn tími í gær. Kannski næ ég einum vatnsdeigsbolluskammti í dag. Saltkjötið er alveg látið í friði á þessum bæ hins vegar.

Tónleikarnir í gær gengu bara fínt, Elfa Rún spilaði náttúrlega eins og engill en ég held að við höfum ekki verið með versta móti heldur (= ekki of mikið af klúðrum + þokkalega hreint) Amk var alveg kraftur í hljómsveitinni. Hellings fjör.

2005-02-06

Ørnen er bara nokkuð skemmtilegur. Ákvað að vinna bug á sjónvarpsfælninni fyrir hann, og sveimérþá, ég stóð ekki upp í eitt skipti!

2005-02-05

Var að hlusta á Orð skulu standa, netútsending er bara snilld. Hlusta yfirleitt á endurútsendinguna á miðvikudögum á leið í vinnuna, stundum man ég ekki eftir að kveikja, stundum þarf ég að mæta fyrr. Amk frábært að geta hlustað á netinu. ADSL rokkar.

annars er ég hrædd um að ég sé að falla í flensuna eða eitthvað. Væri dæmigert; maður heldur sér uppi meðan maður verður, svo kemur hrunið. Held mér uppi á morgun, get ekki gert Óliver og Elfu Rún það að verða veik á morgun.

Svo er reyndar aðalfundur Tónverkamiðstöðvar á mánudaginn. Ég er í stjórn en þau þola nú alveg að vera án mín á fundi samt. Huh, fundir. Kannski verra með krakkana í Hafnarfirði, tónfræðapróf í vikunni á eftir, síðasti tími fyrir próf á þriðjudag/miðvikudag.

kannski verð ég ekki veik. Er hins vegar (nokkurn veginn) búin að læra þetta með að vera veik þegar ég er það. Bara tómt rugl að harka af sér og mæta, maður smitar í kring um sig og verður svo mun veikari, lengur að ná sér, meira tap fyrir alla. Hmm.
síðustu æfingu fyrir SÁ tónleika lokið, ég þurfti ekki að setja upp hauspokann í Mendelssohn í dag, en ég vona nú samt að hann verði enn betri á morgun. Ennþá svolítið þungur.

Annars er ekkert smávegis mikið af tónleikum á morgun. Fernir tónleikar sem fjölskyldan tekur þátt í. SÁ klukkan fimm, útgáfutónleikar Kórs Áskirkju á sama tíma, (þar syngur Hallveig systir), mamma og pabbi að syngja í Dvorák messu í Hjallakirkju um kvöldið og svo eru Caput tónleikar, einnig um kvöldið, þar eru frændsystkin mín að spila. Jú, og ætli sé ekki sýning á Óliver fyrir norðan, þar sem Óli bróðir syngur. Hvernig er það annars, Þorbjörn, ert þú ekkert að syngja á morgun?

2005-02-04

Sinfónían í gærkvöldi, flottir tónleikar. Verk eftir Jón Nordal, Atla Heimi, Hauk Tómasson og Kjartan Ólafsson. Una Sveinbjarnardóttir lék einleik í verki Atla, gerði það með glæsibrag. Verkið ekki sérlega aðgengilegt, og örugglega hunderfitt í flutningi. Ég var hrifnust af Venite ad me, eftir Jón Nordal og svo verkum Hauks. Dauðlangar til að sjá óperuna hans, verkið sem hann fékk tónlistarverðlaun Norðurlandaráðs fyrir. Að minnsta kosti var búturinn úr því sem var fluttur í gærkvöldi ekkert smá flottur.

Tónskáldapartí á eftir, allt of mikið rauðvín. Mygluð í dag, en þess virði. Andlega þenkjandi slagverksleikari tók mig í sálgreiningu þegar vel var liðið á partíið. Ég er víst Scholar. Merkilegt...

2005-02-03

Og talandi um Íslensku tónlistarverðlaunin...

Mikið held ég nú að blessuð akademían hafi farið inn á kosningasíðuna og krossað við nöfnin sem hún kannaðist við. Bryndís Halla með tvenn verðlaun og svo Víkingur Heiðar með björtustu vonina. Einmitt og nákvæmlega fólkið sem hefur fengið mestu pressuna.

Ekki það að þau eigi þetta ekki skilið, mjög frambærilegt fólk og flottir tónlistarmenn. Ég hefði þó kosið allt aðra (og gerði, reyndar)

Hefði viljað sjá Íslensku óperuna með flytjanda ársins að minnsta kosti. Besta sýning sem ég hef nokkru sinni séð í óperunni. Ekki veikur punktur.

Og svo Eyva eða Aton með björtustu vonina.

ójá.
Fór á tónleika Lúðrasveitar Reykjavíkur í gærkvöldi, voru haldnir klukkan 10 um kvöldið. Hélt þeir yrðu stuttir úr því þeir voru svona seint, en nei, ekki búnir fyrr en undir miðnætti, hlé og allt.

Fyrrihlutinn var svolítið þunnur í roðinu, ósköp skemmtilegt og fjörlegt en ekki sérlega innihaldsríkt. Eftir hlé lifnaði yfir dagskránni, verk eftir systkinin Báru og Lárus Grímsbörn. í verki Báru, Skinnpilsu (sic) var mikil stemning, áhrifarík notkun á slagverki og ýmsum effektum, án þess þó að þeir væru aðalatriðið. Enda fjallaði verkið um draug. Hefði trúlega þurft heldur meiri æfingu, samt, pínu óöruggt á köflum. Verk Lárusar, Óður II var mikið stuðstykki og vel spilað, sér í lagi af sólistanum, Berglind Maríu Tómasdóttur. Heyrðist vel að tónskáldið á rætur í poppinu.

Svo mætir maður á Sinfó í kvöld, bara verð að heyra Venite ad me á tónleikum. Það verk hefði átt heima í Tónlistarverðlaununum í gærkvöldi.
úpps!

2005-02-02

Fínn dómur hjá Jónasi í dag. Miðað við keyrsluna um helgina er kannski ekkert skrítið að sumar háu innkomurnar hafi verið örlítið hásar ;-)

2005-02-01

Búin að vera strembin vika í meira lagi. Hellings undirbúningur fyrir upptökur, verulega heví helgi, upptökur á föstudegi til miðnættis, laugardegi dittó og svo sunnudegi til sex. Að sjálfsögðu ekki farið að sofa fyrr en um fjögurleytið báðar næturnar, maður er alltaf jafn vitlaus. Síðan í bæinn, sofnaði svo sem ekkert mega seint á sunnudagskvöldið en ekkert snemma heldur. Stóð á haus í að búa til prógramm og láta prenta, í gærmorgun, svo undirbúningur fyrir kennslu, kenna frá þrjú til sjö, rjúka heim, hjálpa smá til við eldamennsku, fara í konsertföt og fés, borða, þeytast út í Seltjarnarneskirkju og svo tónleikar frá 10 til 11 um kvöldið. Adrenalíninnspýtingin á tónleikunum gerði það að verkum að það var ekki séns að sofna í gær, fyrr en löngu eftir miðnætti.

Og ef dagurinn í dag hefði nú verið eitthvað léttur, ónei. Með strákinn til læknis klukkan átta, kennarafundur hálfellefu, heim, undirbúa kennsluna í snarhasti, kenna frá tvö til sex, sækja stelpurnar sína á hvorn staðinn, heim og klykkt svo út með hljómsveitaræfingu frá átta til hálfellefu. Elfa Rún mætti og spilaði að sjálfsögðu eins og engill, hljómsveitin skelfileg í fyrra rennsli en snarskánaði síðan þegar hún komst í gang.

Skreið síðan heim, hélt ég myndi sofna undir stýri.

og í staðinn fyrir að fara að sofa, sit ég hér og blogga. Reikkva ammér :-)
ooojjj!

This page is powered by Blogger. Isn't yours?